طالبان:په ټولنه کې د راستنیدونکو اغیزمن ادغام زموږ لومړیتوب دی

د طالبانو د ډلې د کډوالو او راستنیدونکو چارو سرپرست وزیر مولوي عبدالکبیر وايي چې په ټولنه کې د راستنیدونکو اغیزمن ادغام د دوی د ډلې له لومړیتوبونو څخه دی.

د جمهورآژانس د راپور له مخې، د طالبانو ډلې تر کنټرول لاندې د هیواد د کډوالو او راستنیدونکو چارو وزارت د سې شنبې په ورځ (د وري ۱۹مه) په یوه اعلامیه کې وویل چې د دې وزارت مشر مولوي عبدالکبیر د راستنیدونکو کډوالو د اسانتیا او ښه مدیریت لپاره د همغږۍ په غونډه کې وویل: "د راستنیدونکو کډوالو ښه مدیریت، د هغوی ستونزو ته رسیدګي او په ټولنه کې د هغوی اغیزمن ادغام زموږ له لومړیتوبونو څخه دي چې جدي پاملرنې ته اړتیا لري."

طالبانو ویلي چې دوی هڅه کوي چې د ټولو اړوندو څانګو او شریکو سازمانونو په همکارۍ د دې ستونزو د حل لپاره عملي، ګډ او همغږي ګامونه پورته کړي.

طالبانو ویلي چې په دې غونډه کې، د فرضي تورخم کرښې، سپین بولدک پولې او نورو متمرکزو سرحدي سیمو د وضعیت په اړه، ګډونوالو په دې بحث وکړ چې څنګه هیواد ته راستنیدونکو کډوالو ته لنډمهاله سرپناه، بیړني روغتیايي خدمات، نوم لیکنه او پیژندنه او نور اساسي او اړین خدمات چمتو شي.

جمهورخبري آژانس