د ننګرهار ولایت مرستیال والي د ملګرو ملتونو ادارو، کورنيو او بهرنيو مرستندويه بنسټونو او ولايتي سکتوري ادارو له استازو سره د را ستنېدونکو کډوالو د ملاتړ په موخه بېړنۍ غونډه کړې ده.

د جمهور آژانس د خبر له مخې په دې غونډه کې له پاکستان څخه د بېرته راستنېدونکو افغان کورنيو د باعزته ستنېدنې، ملاتړ او بيا مېشته کېدنې پر څرنګوالي خبرې شوې دي.

مولوي عزيزالله مصطفی د تورخم له وروستي سفر وروسته ویلي، د کډوالو د وضعیت په اړه یې راپور چمتو کړی دی.

نوموړي زیاته کړې؛ افغان کډوال په پاکستان کې له جبري ایستلو، د مادي او معنوي حقونو له سرغړونې او بې نظمه راستنېدو سره مخ دي، چې له امله یې د تورخم د خدماتو پر ظرفیت منفي اغېز کړی دی.

نوموړي ټینګار کړی، چې د افغان حکومت له لوري به دا موضوع له پاکستاني چارواکو سره د ديپلوماتيکو لارو وڅارل شي.

جمهورخبري آژانس