مجاهد: ازبکستان افغانستان کې له شته واقعیتونو څخه ښه درک لري

د طالبانو د حکومت ویاند د افغانستان او ازبکستان ترمنځ اړیکې ښې ګڼي او زیاتوي چې دواړه هېوادونه د ګډو ګټو ساتنې ته ژمن دي.

د جمهور خبري آژانس د خبر له مخې نوموړی له ازبکستان سره د اړیکو لا پراختیا ته د هیلې په څرګندولو سره وايي چې یاد هېواد په افغانستان کې له شته واقعیتونو څخه ښه درک لري.

وړمه ورځ د ازبکستان ولسمشر ټینګار کړی وو چې د افغانستان په اړه یې د هېواد تګلاره تل عملي ده او له ګاونډیو هېوادونو په ځانګړې توګه ازبکستان سره له رغنده تعامل پرته د افغانستان پرمختګ ناشونی دی.

شوکت میرضیایوف د دې خبرې په څرګندولو سره چې ازبکستان له اروپايي ټولنې او نورو نړیوالو شریکانو سره د افغانستان د پرمختګ په برخه کې همکارۍ ته چمتو دی وویل چې په افغانستان کې ټیکاو د منځنۍ آسیا هېوادونو او اروپايي ټولنې له ګډو ګټو سره سمون لري.

جمهورخبري آژانس