د طالبانو ډلې د کډوالو او راستنیدونکو چارو سرپرست وزیر ادعا کوي چې د دې ډلې امارت د افغانستان لپاره د روښانه راتلونکي لپاره کار کوي.
د جمهور اژانس د راپور له مخې، د طالبانو ډلې تر کنټرول لاندې د هیواد د کډوالو او راستنیدونکو چارو وزارت نن پنشنبه (د وري ۱۴مه) په یوه بیان کې وویل چې د دې وزارت مشر مولوي عبدالکبیر د کوچني اختر په دریمه ورځ په کابل کې له یو شمیر علماوو، قومي مشرانو، مجاهدینو او عامو خلکو سره ولیدل. طالبانو ویلي چې میلمنو د طالبانو د امارت د پرمختګ ستاینه وکړه او په هیواد کې د سولې د ټینګښت لپاره یې د امنیتي ادارو هڅې وستایلې.
په دې غونډه کې مولوي عبدالکبیر ادعا وکړه چې د طالبانو امارت د افغانستان لپاره د روښانه راتلونکي لپاره کار کوي او په دې برخه کې د خلکو همکاري ډېره مهمه او اغېزمنه ده.
طالبانو ویلي چې د هیواد د ستونزو حل او پرمختګ د طالبانو د رژیم له برکته دی، او امنیتي ادارې او مجاهدین د خلکو په همکارۍ د تلپاتې سولې لپاره شپه او ورځ کار کوي.
جمهورخبري آژانس
