افغانستان د فوټپال آسیا جام کې له پاکستان، میان مار او سوریې سره ګروپ کې شوه

د افغانستان د فوټبال ملي لوبډلې د ۲۰۲۷ اسیا ملتونو جام سیالیو ته د لار موندنې د غوراوي سیالیو په پړاو کې، د پاکستان، میان‌مار او سوریې له لوبډلو سره په یوه ګروپ کې شوه.

د جمهور خبري آژانس د خبر له مخې د افغانستان د فوټبال فډراسیون اعلان کړی چې، د دغو سیالیو د پچې اچونې وروستی پړاو ترسره شو او د افغانستان ملي لوبډله به په «E» ګروپ کې له دغو درې لوبډلو سره سیالي وکړي.

د سیالیو دغه پړاو د ۲۰۲۵ کال د مارچ په میاشت کې پیلېږي او د افغانستان لوبډله به په خپله لومړۍ لوبه کې د میان‌مار پر وړاندې سیالي وکړي.

دا په داسې حال کې ده چې، د هېواد د فوټبال ملي لوبډلې څه موده مخکې د ازبیکستاني عثمان توشف سر روزونکي په لارښونې، په دوشنبې ښار کې، د تاجیکستان او نیپال لوبډلو پر وړاندې ماتې منلې وه.