د طالبانو د ډلې سیاسي مرستیال مولوي عبدالکبیر ادعا کوي چې نړۍ د دغې ډلې د واکمنۍ په درک کولو سره د خپلو نظریو په څرګندولو کې بدلون راوستی دی.
د جمهور خبري آژانس د خبر له مخې د طالبانو ډلې تر کنټرول لاندې سیمه د دوشنبې په ورځ (د لړم ۲۱ مه) په یوه خبرپاڼه کې ویلي، چې د دغې ډلې سیاسي مرستیال مولوي عبدالکبیر د افغانستان نړیوال اسلامي پوهنتون له یو شمېر دوکتورا محصلینو سره وکتل.
ويناوالو په هېواد کې د دوکتورا تر کچې د لوړو زده کړو پيل يو ښه ګام وباله او په نورو پوهنتونونو کې يې هم د دوکتورا د کورسونو د پيل غوښتنه وکړه.
مولوي عبدالکبیر وویل، افغاني ټولنه ښه ظرفیتونه لري او د طالبانو امارت د ځوانانو او کدرونو ښې روزنې ته پوره ژمن دی.
نوموړي زياته کړه، چې د نورو برخو ترڅنګ په سياسي برخه کې هم د پام وړ پرمختګ شوى او په نږدې راتلونکي کې به له يو شمېر نورو هېوادونو سره هم سياسي اړيکې پيل کړي.
هغه ادعا وکړه چې په دې وروستیو کې نړۍ د طالبانو د امارت د واکمنۍ په درک کولو سره د خپلو نظریو په څرګندولو کې بدلون راوستی دی.
د یادولو وړ ده چې د طالبانو ډلې ته د افغانستان د تسلیمیدو نه وروسته څه دپاسه درې کاله کیږي چې تر اوسه هیڅ هیواد دا ډله په رسمیت نه ده پیژندلې خو دا نه ده څرګنده چې د نړۍ سره د اړیکو د پراختیا لپاره د طالبانو د ادعا اساس له کومه کیږي.
جمهورخبري آژانس
