د طالبانو سیاسي مرستیال مولوي عبدالکبیر نن د افغانستان د خصوصي پوهنتونونو له یو شمېر چارواکو او استازو سره وکتل.
د جمهور آژآنس د خبر له مخې د افغانستان د طالبانو تر ولکې لاندې ارګ په یوه خبرپاڼه کې ادعا کړې، چې په دې غونډه کې د هېواد د پوهنې د برخې په استازیتوب د خصوصي پوهنتونونو مسوولینو او استازو د طالبانو د سیاسي دفتر له همکارۍ مننه وکړه.
په دې اعلاميه کې ويل شوي چې د خصوصي پوهنتونونو استازو په افغانستان کې خصوصي ښوونه او روزنه د ځوان نسل د زده کړې لپاره ارزښتناکه وبلله او زياته يې کړه چې اوسمهال په سلګونو زره محصلين په خصوصي پوهنتونونو او لوړو زده کړو موسسو کې په زده کړو بوخت دي. په داسې حال کې چې زرګونه استادان په زده کړو بوخت دي.
يادو شويو مسوولينو وويل چې د هېواد د لوړو زده کړو موسسې به په تدريجي ډول د نړيوالو تحصيلي موسسو په کچه شي.
د خصوصي پوهنتونونو مسوولینو خپلې ستونزې د طالبانو له سیاسي مرستیال سره شریکې کړې او وړاندیز یې وکړ چې د خصوصي زده کړو او ښوونیز سکتور د لا زیاتې مرستې په خاطر دې د اړتیا په صورت کې یوه څو اړخیزه کمېټه جوړه شي چې غونډې وکړي.
په همدې حال کې مولوي عبدالکبیر په دې غونډه کې ادعا وکړه چې د طالبانو امارت د ساینس او پوهنې ملاتړ کوي او هڅه کوي چې د لوړو زده کړو خصوصي سکټور ته ښې اسانتیاوې برابرې کړي.
دغه طالب همداراز ادعا وکړه چې د طالبانو ډله دیني او عصري علومو ته ارزښت ورکوي او له همدې امله د دیني او عصري علومو ترمنځ واټن له منځه تللی دی.
مولوي عبدالکبير يادونه وکړه چې د دغې ډلې لومړني اهداف ترلاسه شوي او اوس له ګاونډيانو، سيمې او نړۍ سره د طالبانو اړيکې په ښه حالت کې دي.
جمهورخبري آژانس
