د امریکا د بهرنیو چارو وزارت د افغانستان لپاره د زده کړو ځانګړی پروګرام فولبرایټ لغوه اعلان کړی دی.
د جمهور آژانس د خبر له مخې دغه وزارت وايي، تر میاشتو غور وروسته یې دا پرېکړه کړې، چې د راتلونکي کال لپاره د افغانستان برخه فولبرایټ پروګرام لغوه کړي.
ټاکل شوې وه چې روان کال شاوخوا ۱۴۰ کسه په شرایطو برابر کسان د فولبرایټ له لارې د لوړو زده کړو په موخه امریکا ته لاړ شي.
خو د امریکا د بهرنیو چارو وزارت ویلي، سره له دې چې دا خبر ناهیلي کوونکی دی خو روان کال دوی افغان محصلین د زده کړو لپاره نه مني.
باید و ویل شي، فولبرایټ د امریکا د بورسیو تر ټولو مشهور او ستر پروګرام ګڼل کېږي چې هر کال د نړۍ له ګوټ ګوټ لسګونه محصیلین د امریکا په معتبرو پوهنتونو کې د زده کړو لپاره معرفي کوي، چې په دې لړ کې له افغانستان هم هر کال ګڼ محصلین امریکا ته د لوړو زده کړو لپاره تلل.
جمهورخبري آژانس:کابل
