د افغانستان د کرکټ بورډ ادارې په یوه اقدام کې د کرکټ ملي لوبډلې لوبډلمسشر اصغر افغان له خپلې دندې لرې کړی دی.
د جمهور آژانس د خبر له مخې کرکټ بورډ د اصغر پر ځای د یو ورځنیو او ټسټ لوبو لپاره حشمت الله شهیدي لوبډلمشر او رحمت شاه زرمتی یې مرستیال کپتان ټاکلی دی.
کرکټ بورډ د شل اوریزه لپاره تر اوسه لوبډلمشر نه دی ټاکلی خو په خبرپاڼه کې وايي، دا کار به هم ژر وکړي او راشد خان د شل اوریزه مرستیال کپتان ټاکل شوی دی.
خبرپاڼه کې د افغان د لرې کېدو لامل دا په ګوته شوی، چې د بورډ په وینا د زمبابوې پر وړاندې په لومړۍ ټېسټ سيالۍ کې ځينې ناسمې پرېکړې کړې دي.
بل لور ته د کرکټ بورډ د بشري سرچينو رئيس نثار احمد افغان له يادو بدلونونو سره هم مهاله له خپلې دندې استعفاء کړې ده.
نوموړي په خپله فېسبوک پاڼه ليکلي، چې په بورډ کې د ناسمو کارونو او په ځانګړي ډول د بشري سرچينو په کارونو کې د شته رهبرۍ غير قانوني لاسوهنو له کبله استعفاء کوي.
د يادونې وړ ده، چې اصغر افغان تر دې وړاندې هم يو ځل له لوبډلمشرۍ ګوښه شوی وو، چې په نړيوال جام کې د ملي لوبډلې له پرلپسې ماتو وروسته د کرکټ بورډ د رهبرۍ په بدلېدو يو ځل بيا د ټولو فارمټونو لپاره لوبډلمشر وټاکل شو.
جمهورخبري آژانس:کابل
