ملي دفاع وزارت وايي، افغان کمانډو ځواکونو دا ځل په کندوز ولایت کې د طالبانو پر یوه زندان چاپه وهلې او دا زندان یې مات کړی دی.
د جمهور آژانس د خبر له مخې دفاع وزارت نن پنشنبې د سلواغې ۳۰ مه خپره کړې خبرپاڼه کې ویلي، کمانډویانو تېره شپه د کندوز ولایت د آقتاش ولسوالۍ په کابلي قشلاق کلي کې د طالبانو پر زندان چاپه و وهله.
په خبرپاڼه کې ویل شوي، په دغه عملیاتو کې د طالبانو زندان مات او ۲۴ تنه چې ۱۶ تنه یې پوځیان، ۴ کمانډویان، ۲ پولیس، یو د ملي امنیت کارکوونکی او یو ملکي وګړی راخوشي کړل.
طالبانو تر اوسه په دې اړه څه نه دي ویلي.
دا په داسې حال کې ده، چې درې شپې وړاندې هم د پوځ ځانګړو ځواکونو د بغلان ولایت په مرکزي بغلان ولسوالۍ کې د طالبانو پر یوه زندان چاپه اچولې وه.
هغه مهال دفاع وزارت ویلي، چې له دغه زندان څخه ۴۲ تنه چې ۲۵ یې نظامیان او ۱۷ یې ملکي وګړي و، د طالبانو له منګولو راخلاص کړل شوي وو.
تر دې وړاندې بیا په لوګر، کندهار او هلمند ولایتونو کې هم د طالبانو څلور زندانانو مات او لسګونه ملکي او نظامي کسان ترې راخوشي شوي وو.
جمهورخبري آژانس:کابل
