د کورنیو چارو وزارت وايي، پر کابل پوهنتون د خونړي برید له طراحانو یو تن د محکمې له خوا د مرګ په سزا محکوم شوی دی.
د جمهور آژانس د خبر له مخې د کورنیو چارو وزارت ویاند طارق ارین په په ټوېټر لیکلي، په اعدام محکوم شوی کس عادل نومېږي.
نوموړي ویلي، عادل نوم پر کابل پوهنتون د خونړي برید له طراحانو څخه و، چې د یوې علني محکمې په ترڅ کې په اعدام محکوم شوی دی.
په صادر شویو احکامو کې ابتدایه محکمې ویلي، عادل پر کابل پوهنتون د ترهګر برید او انسان تښتونې له امله په اشد مجازات یعې اعدام محکوم شو.
دغه په دې علني محکمه کې دوهم تورن عبدالله د داعش د غړیتوب، ماین اېښودنې، د چاودېدونکو توکو د لېږد او انسان تښتونې په تور په ۲۵ کاله تنفذي بند محکوم شوی دی.
همدارنګه درېیم کس چې عبدالکبار نومېږي د ملي خیانت، داعش د غړیتوب او انسان تښتونې په تور په ۱۲ کاله تنفذي بند محکوم شوی دی.
څلورم کس چې خدابخش نومېږي هم د داعش د غړیتوب او انسان تښتونې په تور په ۱۲ کاله تنفذي بند محکوم شوی دی.
خو پنځم کس په نغدي جریمه محکوم او شپږم کس پرې د اسنادو او ثبوت نه لرلو امله بې ګناه ثابت شوی دی.
محکمه وايي، محکوم شوي کسان د استناف غوښتنه کولی شي او که چېرې تایید شي، بیا موضوع سترې محکمې ته ځي او له هغې وروسته د اعدام سزا ته د ولسمشر د لاسلیک اړتیا ده.
باید و ویل شي، چې پر کابل پوهنتون د میلادي نومبر میاشتې په دویمه ډلیز برید وشو، چې ۲۲ تنه په کې و وژل شول او ۴۰ نور ټپیان شول.
د دغه برید مسوولیت داعش ډلې پر غاړه اخیستی وو.
جمهورخبري آژانس:کابل
