د امریکا د کانگرس استازو د مجلس قضایي کمېټې د امریکا د ولسمشر ډونالد ټرمپ د استیضاح لپاره تورونه تایید کړي دي.
د جمهور آژانس د خبر له مخې په دغو تورونو کې د سیاسي گټو لپاره له واک نه ناوړه ګټه اخیستنه او د اوکراین د قضیې په اړه د کانگرس د پلټنو په وړاندې د خنډونو رامنځ ته کول شامل دي.
په قضایي کمېټه کې ددغو تورونو تایید چې اکثریت غړي یې دموکراتان دي، تر ډېره حده د ټرمپ د استیضاح لپاره لاره پرانیزي.
ټاکل شوې چې د جمهوري غوښتونکو په گډون د کانگرس غړي راتلونکې اونۍ د ټرمپ د استیضاح په اړه رایې ورکړي.
ټرمپ او د کانگرس جمهوري غوښتونکو غړو تر اوسه د دموکراتانو له لوري لگول شوي تورونه رد کړي دي او هغه یې د سیاسي انگېزې له مخې لګول شوي تورونه گڼلې دي.
که په کانگرس کې د راتلونکې اونۍ رایه اچونه د ښاغلي ټرمپ په ضد تورونه تائید کړي، هغه به د امریکا په تاریخ کې دریم جمهور رئیس وي چې د کانگرس له لورې استیضاح کیږي.
جمهورخبري آژانس:کابل
