ایراني رسنۍ وایي، د دې هېواد ځواکونو د خلیج په اوبو کې د بریتانیا د تېلو دوه لېږدوونکې بېړۍ نېولې دي.
د جمهور آژانس د خبر له مخې ویل کېږي یوه بېړۍ بېرته پرېښودل شوې خو دویمه ایراني ځواکونو له ځانه سره بېولې ده.
ایراني چارواکو ویلي، د سټینا امپېرو په نامه بېړۍ خپل جي پي اېس بند کړی و، په ناسمه لاره روانه وه او د ایراني ځواکونو په اشاره نه وه درېدلې نو ځکه یې نېولې ده.
په ورته وخت کې د یوې بېړنۍ څښتنې ادارې هم ویلي سټینا امپېرو بېړۍ یې د سعودي عربستان په لور روانه وه، خو اوس ورسره اړیکه نه شي نیولي.
یاد شرکت وایي په بېړۍ کې ۲۳ تنه عمله هم سفر کوي او د هرمز تنګي ته نږدې د ناپېژانده کوچینو کښتیو او جنګي چورلکې لخوا درول شوې ده.
د دې پېښې په اړه لندن کې د بریتانیا حکومت د کابینې بېړنۍ غونډه رابللې چې د روان وضعیت په اړه خبرې وکړي.
د بریتانیا د بهرنیو چارو وزیر جیرمي هنټ ویلي، د دې وضعیت په اړه سخت اندېښمن دی.
جمهورخبري آژانس:کابل
