د ټاکنو خپلواک کمېسیون د یوې خبرپانې په خپرولو سره اعلان کړی، چې ښايي ولسمشرۍ ته د نوم لیکنې موده وغځول شي.
د جمهور آژانس د خبر له مخې یاد کمېسیون په یوه خبرپانه کې ویلي، چې د راتلونکو ولسمشریزه ټاکنو د وخت او څرګندوالي په اړه په ټول هېواد کې د اجماع پر رامنځ ته کېدو کار روان دی.
د دغه کمیسیون په خبرپاڼه کې راغلي، چې نوملیکنه د جدیې په لومړۍ نېټه پیل شوې ، خو تر دې دمه هېڅ نوماند د نوملیکنې لپاره نه دی ورغلی.
دغه کمېسیون وايي، همدې ته په کتو ښايي د ولسمشرۍ له پاره د نوم لیکنې په موده کې تغیر راشي او دغه موده نوره هم وغځول شي.
په خبرپاڼه کې ویل شوي، چې د روانې میاشتې تر ۱۲مې به د نوملیکنې پروسه په نورماله توګه روانه وي، خو تر هغه وروسته به د کمیسیون پرېکړې ته په کتو دغه موده غځول کېږي.
سرچینه ټینګار کوي، د دې لپاره چې د نوماندانو لپاره د سلا مشورو زمینه برابره شي او دوی وکړی شي چې د نوملیکنې شرایط پوره کړي نو ښايي د نوملیکنې موده وغځول شي.
جمهورخبري آژانس:کابل
