وسله والو طالبانو ویلي، چې د افغان حکومت له لوري د اوربند شوی وړاندیز ارزوي او په دې اړه به خپله پرېکړه وروسته اعلان کړي.
د جمهور آژانس د خبر له مخې ولسمشر غني نن پنشنبې د غبرګولي ۷ مه په یوه ویډیويي پیغام کې و ویل، چې د علماوو د وروستۍ غونډې چې په کې یې په افغانستان کې روانه جګړه ناروا وبلله او د سولې په خاطر یې د اوربند ضمني وړاندیز وکړ، نو حکومت هم دغه فتوا او د علماو پرېکړې ته په درناوي له افغان طالبانو سره د اوربند اعلان کوي.
ولسمشر غني و ويل، چې حکومت د علماوو همدي پرېکړه ته په درناوي د روژې مبارکې میاشتې له ۲۷ د اختر ۵ پورې له افغان طالبانو سره اوربند اعلانوي، او ټولو امنیتي ځواکونو ته امر کوي، چې په دې موده کې پر افغان طالبانو هېڅ ډول تهاجمي عملیات ونه کړي.
افغان ولسمشر و ویل، چې دا اوربند یوازې د افغان طالبانو سره دی، خو د نورو ترهګرو ډولو پر وړاندې به افغان ځواکونه بشپړ چمتوالي لري او په هر قمیت به د خپل ولس او خاورې څخه دفاع کوي.
د ولسمشر د دغه وړاندیز په اړه طالبانو ویلي چې د افغان حکومت لخوا د اوربند وړاندیز اروزي.
د طالبانو ویاند ذبیح الله مجاهد د فرانسي خبري اژانس سره په خبرو کې د افغان ولسمشر د اوربند وړاندیز ته په غبرګون کې ویلي، چې یاد وړاندیز له خپلو لوړپوړیو مشرانو سره اروزي او په دې اړه به خپله پرېکړه وروسته اعلان کړي.
د ولسشمر دغه وړاندیز په ټولنیزو رسنیو کې هم د ګڼو کسانو له خوا ستایل شوی دی او له طالبانو هم په کې غوښتل شوي، چې اوربند وکړي.
د افغانستان د سولې عالي شورا هم له وسله والو طالبانو غوښتي، چې د ښاغلي غني دغه اوربند ته هرکلي و وايي او دوی هم اوربند اعلان کړي.
بل خوا د افغانستان امنیتي او دفاعي ځواکونو چارواکو هم ویلي، چې دوی به اروبند ته بشپړ درناوي کوي، او پر افغان طالبانو به بریدونه نه کوي.
جمهورخبري آژانس:کابل
