وزارت امور خارجه می‌گوید که محمد حنیف اتمر وزیر امور خارجه با سایمومین یاتیموف رییس کمیته امنیت ملی جمهوری تاجیکستان دیدار کرده است.

وزارت امور خارجه می‌گوید که محمد حنیف اتمر وزیر امور خارجه با سایمومین یاتیموف رییس کمیته امنیت ملی جمهوری تاجیکستان دیدار کرده است.

به گزارش خبرگزاری جمهور؛ وزارت خارجه با نشر اعلامیه‌ای گفته که این دو طرف در این دیدار پیرامون موضوعات مهم امنیتی و تقویت مناسبات سیاسی و اقتصادی میان کابل و دوشنبه بحث و گفتگو کرده‌اند.

بر بنیاد اعلامیه، این دیدار که عصر دیروز یک‌شنبه (26 دلو) انجام شده، آقای اتمر از حمایت دولت جمهوری تاجیکستان از موقف و موضع گیری‌های افغانستان در عرصه‌های ملی و بین‌المللی ستایش و قدردانی کرد.

او، ایجاد کمیسیون‌های امنیتی و سرحدی میان افغانستان و تاجیکستان را در سطح شورای امنیت ملی و وزارتخانه‌های سرحدی دو کشور در قبال تبادل اطلاعات و همکاریهای امنیتی، حایز اهمیت دانسته، خاطرنشان کرد که موضوعات یادشده را در نشست سه‌جانبۀ افغانستان، امریکا و تاجیکستان، مطرح خواهد کرد.

همچنین، آقای اتمر پروژه‌های مشترک اقتصادی، به‌شمول پروژۀ دشت جم برای تولید برق، آبیاری و میکانیزه‌ساختن زراعت و اتصال تاجیکستان از طریق افغانستان به جنوب آسیا، ایجاد شبکۀ فایبر نوری، خط‌آهن تاجیکستان، افغانستان و ایران و پروژهٔ انتقال برق کاسا یک‌هزار و توتاپ را گام‌های بلندی در راستای اتصال منطقه‌یی، تعمیق روابط و رُشد اقتصاد دو کشور خوانده‌است.

وزیر خارجه بر همکاری و هماهنگ‌ساختن تلاشها میان کابل و دوشنبه در راستای مبارزه با تروریزم و تهدیدات امنیتی در امتداد مرزها و سرحدات افغانستان و تاجیکستان، تأکید کرد.

بر بنیاد اعلامیه، رییس کمیتۀ امنیت ملی تاجیکستان، آمادگی کشورش را برای گسترش مناسبات و همکاریهای سیاسی و امنیتی با افغانستان ابراز نموده از حمایت دوشنبه از مذاکرات صلح و یافتن راه حل سیاسی به بحران جاری افغانستان، به وزیر خارجه اطمینان داد.

این در حالی است که افغانستان و تاجیکستان همواره روابط نیک داشته اند؛ اما در سال‌های اخیر دولت تاجیکستان از احتمال نزدیک شدن ناامنی‌ها به مرزهای شان با افغانستان نگران است.

خبرگزاری جمهور- کابل