گفتگوی روئسای جمهور افغانستان و تاجیکستان؛ غنی دعوت امام علی رحمان را پذیرفت

ارگ ریاست جمهوری می‌گوید که رییس جمهور غنی با امام علی رحمان رییس جمهور تاجیکستان تلفنی گفتگو کرده است.

به گزارش خبرگزاری جمهور؛ ارگ ریاست جمهوری امروز دوشنبه (3 سنبله) با نشر اعلامیه‌ای گفته که در این مکالمۀ تلفنی، سران دو کشور در مورد روابط دوجانبه به ویژه در خصوص تجارت، ترانزیت، تقویت هر چه بیشتر همکاری های منطقوی و افزایش همکاری‌ها در امتداد سواحل دریای آمو، صحبت کردند.

رییس جمهور غنی گفته که سرحد افغانستان و تاجیکستان به نقطۀ دوستی و پیشرفت مبدل می‌گردد و نمونۀ دوستی و همکاری خوب میان دو کشور همسایه خواهد بود.

امام علی رحمان رییس جمهور تاجیکستان از پروسۀ صلح به رهبری و مالکیت حکومت افغانستان حمایت قوی کرد و ضمن حمایت از موقف رییس جمهور، وعده داد که تاجیکستان در نشست‌های منطقه‌ای و بین المللی، در کنار افغانستان خواهد بود و از موقف حکومت افغانستان حمایت خواهد کرد.

در اعلامیه ارگ آمده که رییس جمهور امام علی رحمان از رییس جمهور غنی به خاطر گسترش روابط دوجانبه و چندین جانبه و توسعه همکاری‌ها، دعوت کرد که به تاجیکستان سفر کند و رییس جمهور غنی با ابراز امتنان این دعوت را پذیرفت و از امام علی رحمان به خاطر سفر به افغانستان نیز دعوت بعمل آورد.

هر دو جانب توافق کردند که تحت ریاست محمد حنیف اتمر سرپرست وزارت امور خارجه، هیات بین الوزارتی در روزهای نزدیک به تاجیکستان سفر کرده و روی آجندای نشست روئسای جمهور تاجیکستان و افغانستان به خاطر همکاری‌های بیشتر، کار کند.

همچنین در این گفتگو توافق شده که هیات‌های دو کشور در مورد مسایل سیاسی میان دو کشور، همکاری‌های اقتصادی و امنیتی به ویژه مبارزه علیه تروریزم و مواد مخدر، نیز بحث کنند.

این در حالی است که اخیراً گفتگوی رییس جمهور تاجیکستان با باشندگان مناطق مرزی افغانستان از طریق بلندگو و وعده رسیدگی به درخواست کمک باشندگان منطقه مرزی بدخشان افغانستان در شبکه‌های اجتماعی خبرساز شده بود.

باشندگان بدخشان افغانستان از امام علی رحمان خواسته بودند که برای آنان برق و امکانات محیا سازد. مناطق مرزی بدخشان افغانستان با تاجیکستان تمامی امکاناتش از طریق تاجیکستان فراهم می‌شود؛ زیرا راه آسانگذر با افغانستان ندارند.

خبرگزاری جمهور- کابل