امنیت ملی: 46 میل سلاح مختلف‌النوع هنگام قاچاق در شهر کابل ضبط گردید

ریاست عمومی امنیت ملی کشور می‌گوید که نیروهای قطعات خاص این ریاست طی عملیاتی، 46 میل سلاح مختلف‌النوع را هنگام قاچاق در شهر کابل کشف و ضبط کرده‌اند.

به گزارش خبرگزاری جمهور؛ ریاست عمومی امنیت ملی، امروز دوشنبه (2 جدی) با نشر خبرنامه‌ای گفته این سلاح‌ها در مربوطات ناحیه هفدهم شهر کابل کشف گردیده است.

در خبرنامه آمده:"یک عراده موتر نوع مرسدیس مربوط قاچاقبران سلاح که در آن  به تعداد 40 میل تفنگچه مختلف النوع، 4 میل کلاشینکوف، یک میل کرینکوف، یک میل ماشیندار پیکا و 12 کارتن مرمی تفنگچه جابجا گردیده بود از ناحیه هفدهم شهر کابل کشف گردیده است".

این ریاست همچنان گفته که در یک عملیات دیگر مقدار (650) کیلوگرام چرس خام که در یک عراده موتر نوع داتسن بارگیری گردیده بود از مربوطات قریه آبچکان مرکز ولایت لوگر و مقدار (90) کیلوگرام  چرس خام از مربوطات ناحیه پنجم شهر کابل از منزل فردی به نام احمدشاه کشف گردید.

ریاست عمومی امنیت ملی گفته که شخص احمد شاه نام فرزند رحمت شاه توسط نیروها ی عملیاتی ریاست عمومی امنیت ملی بازداشت گردیده است.

خبرگزاری جمهور- کابل